जाडोको समय सकिने र गर्मीयाम सुरु हुने समयमा स्वाइनफ्लु देखापर्ने भन्दै मन्त्रालयले फ्लु नियन्त्रणका लागि आफू मातहतका निकायलाई सतर्क अवस्थामा रहन निर्देशन दिएको छ ।
स्वास्थ्य सेवा विभागका महानिर्देशक डा. सेनेन्द्रराज उप्रेतीले फ्लु फैलिन नदिन सचेत रहँदै पूर्वतयारीका सबै काम भएको जानकारी दिए । “यो मौसमी रुघाखोकी हो, धेरै डराइहाल्नु पर्दैन तर सचेत रहनुपर्छ” उनले भने ।
भारतमा सो फ्लुका कारण हालसम्म आठ सयको मृृत्यु भैसकेको छ भने करिब ११ हजारभन्दा बढीमा सो फ्लुले सङ्क्रमण गरिसकेको प्रमाणित भैसकेको छ ।
साथै नेपाल भित्रिने भारतीय नाका, त्रिभुवन अन्तराष्ट्रिय विमानस्थलमा निगरानीका लागि हेल्थ डेस्क राख्न प्रबन्ध मिलाउन लागिएको उनले बताए ।
आफू मातहतका सबै अस्पतालहरुलाई छुट्टै बिरामी राख्ने कोठा ‘आइसोलेसन वार्ड’ को तय गर्न विभागले निर्देशन दिइसकेको छ ।
इपिडिमियोलोजी तथा रोग नियन्त्रण महाशाखाका प्रमुख डा बाबुराम मरासिनी स्वाइन फ्लुका लागि भनेर छुट्टै बजेट नभएको भन्दै आन्तरिक बजेटबाट काम भैरहेको बताउछन् । रासस
